معهد المحاماة!!!

عالم فاضل من علمائنا
ماهو مش فاضل غيره تقريباً
زبطوا له المعهد ياخواننا
لاجل الأجيال الصاعدين
أصل المعهد محتاج عالم
عنده مبادئ في الحسابات
يقدر يجمع يقدر يقسم
وإن عنده مبادئ نحوية
يقدر يرفع يقدر ينصب
مسألة القوانين مش فارقه
عمره ما درس حتى محاضره
ماهو من أنصار علم الراس
أفضل طبعاً م الكراس
ولا سقا ولا حتى مليجي
يمكن دقه قديمة ياسيدي
العالـِم اتعلم ياخواننا
انه يعلمنا البهاريز
ازاي تبقى محامي أدرجي
وازاي ح يكون التنفيذ
من قبله المعهد كان شارع
وفي عهده الشارع ح يهيص
معهدنا خلاص موضة قديمة
ولا بيعلم ولا بيفيد
غير بس في تغيير الدرجة
من جدول لوكيل تخليص
مابقاش العلم بيتدرس
ولا فاهم ولا ناس بتدرس
غير بس عشان التفحيص
وامضي ياواد.. وامضي يابت
على نسبة حضور بتعد
يبقى شهادتك خالصة خلاص
وماتنساش حجم البرواز
ماعلهش يا سقا ويا مليجي
يادكاترة عصر التنوير
النور مقطوع جوه نقابتي
من قبل حتى التغيير
غيرنا الفوانيس مش فارقة
جايز فوانيس بايظة كمان
بس في يوم ح نجيب فوانيس
وتنوروا قاعة التدريس
............................