استشارة عاجلة بخصوص تحويل شقة من ايجار قديم الى تمليك

السلام عليكم

احنا اسرة مكونة من اب وام وبنتين وولد كنا عايشين مع بعض فى شقة ايجار قديم بالقاهرة باسم والدى اختى الكبيرة تزوجت فى حياة والدى ووالدتى فى مسكن خاص لها مع زوجها ثم توفى والدى وطلع الوصل باسم ورثة المرحوم والدى وفضلت انا واختى الثانيه ووالدتى فى الشقة ثم تزوجت اختى الثانيه فى مسكن خاص لها ايضا مع زوجها و فضلت انا ووالدتى فى الشقة الى ان توفيت والدتى وفضلت انا لوحدى فى الشقة ومازال الايصال بيطلع باسم ورثة المرحوم والدى ... عرض على صاحب العمارة شراء الشقة تمليك فاشتريتها باسمى عشان اتزوج فيها باذن الله من مالى الخاص عاوز حاليا اجرها لظروف خاصة بى اخواتى عاوزين يطعنوا فى العقد ويفسخوا العقد بحجة ان صاحب العمارة باع لى الشقة من وراهم ولم ياخذ منهم تنازل عن حقهم فى الشقة او بيدعوا انى رضيت صاحب العمارة بمبلغ عشان يرضى يكتب العقد ويتغاضى عن حق اخواتى فى الشقة وطبعا هذا لم يحدث اطلاقا والله شاهد على ما اقول وان اختى الثانيه اللى تزوجت فى حياة والدتى عاوزه تدعى انها كانت مسافرة ورجعت بحجة ان عنوان بطاقتها على نفس عنوان الشقة حاليا بتاعت والدنا لانها لم تقوم بتغير العنوان الى محل ساكنها المتزوجة فيه حاليا ولم تطلع بطاقة عائلية منذ ان تزوجت مع العلم ان وثيقة الزواج بتاعتها مكتوب فيها عنوان المسكن اللى هى عايشه فيه حاليا وكذلك شهادات ميلاد اولادها ومدارسهم فهل يجوز الطعن فى هذه الحالة وفسخ العقد ..علما ان تاريخ وفاة ابى مارس 2005 وامى مايو 2009 ...


ثانى حاجة عاوزين حقهم الشرعى فى الشقة بمعنى لو انا بعتها ياخذوا هما النصف وانا النصف وكذلك بالنسبه للايجار لو اجرتها ياخذوا هما النصف وانا النصف فايه راى حضرتكم فى الكلام ده من الناحية الشرعية هل ليهم حق شرعى فيها بعد ما امتلكتها من اى نوع ... نسيت اذكر حاجة ان العقد اللى معايه حاليا لم يذكر فيه ان الشقة كانت ايجار قديم فهل هناك ضرر من عدم ذكر ذلك مع العلم انى عملت صحة توقيع فقط على العقد ...

معلش اريد ان استفسر عن شى بالنسبه لاختى الثانيه تقصد ايه حضرتك بنية التخلى النهائى الارادى هى طبعا بعد زواجها انتقلت لمسكن زوجها وبقالها حوالى 5 سنوات متزوجة وعندها طفلين تؤام واكيد زى اى بنت كانت بتيجى لينا كل فترة انا ووالدتها كزيارة واحيانا كانت بتبات معانا لمده قصيره واستمرت على هذا الحال حتى بعد وفاة والدتها لانها اساسا متزوجه فى احد محافظات مصر وليست فى القاهرة مع اختها اللى هى متزوجه فى حياة والدها فى نفس المحافظة وشغل جوزها ومدارس اولادها فى هذه المحافظة بالاضافة الى شغلها هى كمان وكذلك شهادات ميلاد اولادها ووثيقة الزواج بتاعتها على عنوانها الجديد اللى هى متزوجه فيه حاليا بالاضافة الى ان كل الجيران والبواب بتاع العمارة عارفين انها اتجوزت بره ...

النقطه اللى هما مركزين عليها اوى احنا عارفين ان لك امتداد قانونى فى الشقة لكن احنا عاوزين حقنا الشرعى لانك مش من حقك ان تاخذها لوحدك واسف جدا لازعاج حضرتك بس اود ان اسمع تعليقك على هذا الكلام ..

طيب معلش فى نقطة مش مستوعبه حضرتك بتقول ان اختى الثانيه ليها حق فى الامتداد مش المفروض بمجرد زواجها وانتقالها الى مسكن زوجها ومعيشتها معاه بصفة دائمة ومستقرة يسقط حفها فى الامتداد القانونى فى شقة والدها لان الزواج مش حالة عارضه او مؤقته كالسفر مثلا ده حياة مستقره ليها وهناك بديل اخر وحيد مستفيد من الامتداد القانونى .. معنى كدا ان لما انا اتجوز فى الشقة ان شاء الله ممكن تيجى اختى ده وزوجها واولادها يقيموا معانا الى ما شاء الله لان لها امتداد قانونى فى الشقة ... انا قراءة الموضوع ده فى جريدة المصرى اليوم :

" يقول المستشار محمد عاصم رئيس محكمة الجنايات وأمن الدولة العليا إن التعديلات القانونية التى تمت فى هذا الإطار أقرت بعدم امتداد عقد الإيجار إلا لوارث واحد، فقبل ذلك كان القانون 49 لسنة 77 يعطى الحق فى امتداد عقد الإيجار إلى الحفيد الخامس أو السادس مما كان يشكل ظلماً على مالك العقار لذلك رأى المشرع أنه فى حالة وفاة المُستأجر الأصلى يؤول المسكن لوارث واحد شريطة أن يكون هذا الشخص الوارث مقيماً فى هذا المسكن لمدة عام على الأقل قبل وفاة المستأجر،

 فمثلا إذا توفى المستأجر تنتقل الشقة لزوجته إذا كانت على قيد الحياة وقتها، وإذا توفيت تنتقل للأبناء ماداموا مقيمين فى المنزل بصفة دائمة أو لمدة سنة على الأقل قبل الوفاة ولا تحق لهم إذا كان لهم محل إقامة آخر بمعنى أن لكل منهم منزله الخاص به ".

بتاريخ 15/4/2010 هتلاقيه حضرتك على النت بس مش عارف احط لينك الموضوع بعنوان " الإيجار القديم يورث الشقة مرة واحدة "...